Bärstadter Kerb 1925
Ich wünsch
eich all en gute Daach,
de Barscheder un de Fremde aach.
Wo kumme sein von noh un weit,
um unser
Kerb ze feiern heit!
E ganzes Johr is wieder vorbei,
die Kerb
misst eigentlich öfter sei;
des ist
noch aa vun dene wenige Sache,
wo noch de
Zeit Vergniesche mache!
Wenns aach nit mehr so wie früher is,
scheh is es doch noch, ganz gewiß,
un wenn
es der Petrus gut mit uns meint,
dann sorgt
er aach, dass die Sunn bal scheint.
Denn wenn
de Klader were naß,
des mecht de Mädcher gar kon Spaß,
un wenn
die böse Gesichter mache,
do habe die
Borsch aach nix ze lache.
Drum will
eich Borsch ich ebbes
erzähle,
lostz nit am nötige Kleingeld fehle,
denn wer
des meiste Geld lost springe
wird sich
des scheenste Mädche
erringe.
Mit der tut
er dann zum Festplatz laafe
un tut e Zuckerherz ihr kaafe,
denn en schene Zuckerstand habe mer jetzt
grad vor em Bäcker sei Haus gesetzt.
Der giht vum Ecksta
bis ans Kellerloch
un finf Zentimeter weiter
noch,
un hot
Pralinees und Zuckerstange,
kurz alles,
was se tut verlange!
Des Mädche wo so wird behandelt,
is in en
Engel dann verwandelt,
un in des
Glickes Iwerschuß
gibbt Sie
eich manche siße
Kuß!
Un hot se
eich während der Kerb gefalle,
so kennt er
se nochher aach behalle.
Drum bleibt
dem Mädche immer trei
und sucht eich net glei
wieder e nei!
Mer heert aach iwwer
die Mädche klage,
dass se de
Kopf so hoch heit trage:
E Bauer tät
en net mehr genieche,
se wolle
all en Beamte kriege!
Die junge
Leit hawe jetz ehrn Duppe,
wenn se aach schenne, ´s is mer Schnuppe
Jetzt will vun der Gemo
eich schwetze,
was do zu
lobe un auszusetze!
Erst kimmt der Borjemoster dro:
Der fihrt mit Umsicht die Gemo.
Un der Gemorot newedro,
bringt Bärstadt wieder uf die Bo!
Un dass
ehr Sach se gut verstih,
des kann mer an der nei Chaussee sih,
die Barsched met Kaufe tun verbinne,
un wie mer so Schih wird wenig finne!
Gut is es aach, dass aus der Hohl
e Stroß no Wombach wern soll.
Des Herz im
Leib eme Jede lacht,
wo die zwei
neie Wieseweg betracht!
Vun
unsern Beamte do nenn ich als Richter
unsern tichtige Lehrer und dann aach
de Ferschter.
Der se
lehrt in der Wolfschul von Bayern un
Sachse,
der anner pflegt die Baamschul, dass
die Fichte grad wachse!
Mit em neie Gemorechner
hawe mers gut getroffe,
er ist erst
21 alt und wenig besoffe.
Beamtefra
ze wern war ihr Ideal,
drum hot sen geheirat e paar Dag no der
Wahl!
Unsern
langjährige Schäfer den musste mer pensionieren,
der tut
jetzt in Walluf die Schees
rumkutschieren,
seiner Fra gefällts in Barsched immer noch gut,
weil se
immer no gern die Schul putze tut!
Die Völkerwandrung war, so hot mer gelese,
375 no
Christus gewese,
doch derft ehr mer glawe,
des is jo net wohr,
sie war jo in Barsched im vorige Johr!
Vier Völker
sin met Sack und Pack gewannert hin und her,
zum Owerdorf ins Unnerdorf die Kreiz un die Quer,
doch bliewe die vier Völkerstämm all
hier in unserm Ort,
nur unser
Fahrradreparaturwerkstatt kam weiter fort.
Vun
unserm neie Schiedsmann is
nix schlechtes ze berichte,
er sucht en
jede Streit no Meglichkeit ze
schlichte.
Doch dass
des net so afach, des kennt
er eich jo denke,
un wenn
ich sollte Schiedsmann sei, tät ich mich henke!
Von Barsched no Hause uf der neie Chaussee,
do kammer bei Regewetter jetzt ganz sauber geh.
Die Hausemer Hebamm hot dodra Vergniege,
jetzt misst
die gut Fra noch e Autoche
kriege!
Fortschritt
in jeder Hinsicht find mer in unserm Ort,
un jeder
hot was übrig for en gesunde Sport:
Des
Turnfest vor sechs Woche ist der allerbest Beweis,
wer zwamol in die Turnstund geht, der
krieht de dritte Preis!
Un aach die Sängerrieg ist wieder ufgewacht,
mer heert die Kerle singe bei Dag un aach bei Nacht.
Doch des
beste was mer hawe, is unser Feierwehr,
jetz hawe die Annern ko Spritzeprobe mehr!
Mer hawe jetzt in der Gemaa
ein Dorf- und Gartebau-Veraa,
der hot en
Kursus schun gehalle.
De
Mitglieder hot es gut gefalle!
Nor ons des mecht mer
gar ko Freid,
der Hochmut
vun de junge Leit.
Die kunnt mer jede Sunntag sih,
im
Gummimantel ins Kino gih!
Des Schwetze fällt mer uf amol schwer,
drum holt mer mol de Mundschenk her!
Der soll mer gleich mei Gläsche fille,
dass ich emol mein Dorscht kann stille!
Mundschenk ze sei, des is net leicht:
Doch
unserer der is gut geeicht!
Dem braucht
mer est gar net ze winke,
er tut als schun vun selber trinke!
Die
Kerbemusikante dort
die lurn aach uf e gutes Wort,
drum tu mei Gläsche ich erhewe:
Die Musikante solle lewe!
Un hoch lewe Bärstadt un
die Bärstadter Kerb,
uf Wiedersih nächst Johr, wann ich net vorher sterb!